عشرة جنية!!!!

نص لحمه
ولا ربع كفته
ولا فرخه مشويه
او اتنين بيتزا
بيقولو انها ايطاليه
كله بعشره جنيه
علبه مارلبورو ومشط كبريت
او باكو لبان مبيضيعش ريحه الدخان
مش مهم
فى فلوس جايه ف الفنجان
كله بعشره جنيه
شريط كاسيت سافف من زمان
مشاريب ع القهوه
وسنين بتعدى ف نفس المكان
ساندويتش السنكحه
ديون الزلزال

دنيا المطوحه
انتماء الخايف
لقمه العيال
بقال النواشف
مواصلات الزواحف
مزين السوالف
كارت المعارف
تاريخ الصلاحيه للكل مفتوح
البنى أدم هو التالف
التاريخ ع الارصفه او تراب ف المتاحف
بعشره جنيه
تشترى عشرين شقه
تاجر وتكسب وتتجوز

وتعول وتنول
وتعزم كل معارفك
ماهم عشرين شقه فول
بعشره جنيه
وانا بوصلك اخر مره دفعتهم للتاكسى
يوم ما وصيتك اول عيل تسميه باسمى
يومها ابو الهول وقع منه حته
عشره جنيه
دمغه ع الباسبور
رايح ابيع بكاليوريوس الفراعنه
واشترى هباب البترول
بعشره جنيه